कैलालीको घोडाघोडी नगरपालिका–१ सुखडमा सञ्चालित कृषि हाट तथा थोक बजारका कृषकहरूलाई सामाग्री वितरण गरीएको छ । व्यवसायीक सेवा प्रदायक सञ्जालका संयोजक तथा कृषि शाखा प्रमुख जनक सि धामीले कृषकहरूलाई सामाग्री वितरण गरेका हुन् । ६० जना कृषकहरूलाई एक÷एक वटा त्रिपाल र क्रेट वितरण गरीएको छ ।

अस्थाई रुपमा संचालन भइरहेको कृषि हाट तथा थोक बजारका कृषकहरूलाई विक्री वितरणमा केही राहत पुगोस् भन्ने उद्देश्यले त्रिपाल र क्रेट वितरण गरीएको बताईएको छ । केही दिन अगाडी दिगो विकास समाज भजनी कैलाली र वर्ल्ड भिजन इन्टरनेशनल नेपाल कैलालीको साझेदारीमा सञ्चालित महिला र प्रवासीहरूको आर्थिक पुनः स्थापना परियोजनाले व्यवसायीक सेवा प्रदायक सञ्जाललाई उक्त सामाग्रीहरू हस्तान्तरण गरीएको थियो ।

मङ्गलवार ती सामाग्रीहरू कृषि हाट बजारका कृषकहरूलाई वितरण गरीएको हो ।स्थायी टहरा नहुँदा कृषकहरू त्रिपाल टाँगेर आफ्ना कृषि जन्य उत्पादनहरू विक्री वितरण गरीरहेका छन् । सुखडमा हरेक हप्ताको शनिवार र मङ्गलवार कृषि हाट बजार लाग्ने गर्दछ ।

मङ्गलवार भने गाउँका कृषकहरूले आफ्ना कृषि जन्य उत्पादनहरू विक्री वितरण गर्छन् भने शनिवार सुखड लगायत बाहिरका व्यापारीहरू र कृषकहरूले कृषि जन्य उत्पादनहरू विक्री वितरण गर्ने गरेका छन् । एक दिनको हाट बजारमा करिब ७० देखी ८० कुण्डलको तरकारी विक्री वितरण हुने गरेको हाट बजार समितिले जनाएको छ ।